Ia dende - ia dende, nia
tojemminjo mae ;
bunting salloa kutayang, salloa
kuminasai ;
bura’ne bura’nena buranea ;
nampako ri ujung borikku, ri
cappa pa’rasanganku ;
naku ruppaiko cini’,
kutimbarangkiko pangngai.
Nampako kuasseng nia’, na
kuitungko labattu ;
kuurangi memang, berasa ri
mangkok kebo’ ;
kummata memang, rappo bau’ ri ballakku
;
kunnanro memang, kalomping ri
talang bulaeng ;
ku tongko intang, kubelo - belo
jamarro’.
Intang macora, nasingarri
dallekannu ;
bulaeng tino’ angsuloi
pacciniknu ;
lakukapeangko anne, sumangaknu
mabellaya ;
lakukiokangko pole, tubunu
‘lampa salaya ;
kutannangkonne, tope talakka’
ri aya’.
Lakka’ tope tamalakakko ikau ;
sangkontu sanrapammamako bulang
sampuloa a ngappak ;
nasusung pale, natinriang
wari-wari ;
wari-wari kapappasang, pale
mannuntunga bangngi ;
nisailenu kau tamalla’junu
nicini’ ma’mole-mole.
Kukio’ daengjakonjo, kukanro
anak karaeng ;
nutuli manai’mo mae ri balakna
matoannu, rituka’na ipara’nu,
matoang tuna, ipara’
kamase-mase ;
mangongjo tongmako anne tukak
tallu anronna, patampulo baringanna ;
manjappatongko pole, coccorang
nita’bu-ta’bu.
Nutuli manai, mannyorong pakke’bu
nigiring-giring ;
mangongjotongko dasere’
nijaling kawa’, nilanro bassikalling ;
mattetetongko pallangga ri
batang rappo ;
mannoso’ tongko padongko
nitau-tau ;
nutilimo kalawu’ rawanganna
timbaonu, ammempo ri benteng polonnu.
A’lapara’ tappere’ boddong,
anjo’jo’ kairi kanang ;
massuro-suro rapannu,
mampattuju sangkammannu ;
naremba-rembako pole, anak rara
patampulo ;
nisarimanangko pole, lonrong
beru ma’bakka’ ;
benteng polong kansako, kanako
benteng pakkai’-kai’ topena pasikaiki bajunna.
Nai’ manaung tunibarang-baranginnu,
assulu’ antama ata ma’balla’ – balla’nu ;
Numa’jarang, numattedong, numa’jangang
rassi lerang ;
nakatumbangngi pole palampang
ase berunu ;
nakatepokangi padongko’ ase
toanu ;
tamanraikko ri ambong nukoasa.
Takalaukko ri Jawa, nukalumannyang,
tama’botorokko numammeta ;
assare-sareko sallang, ri
matoang kasiasi ;
appiturummako pole, ri ipara’
kamase-mase ;
naik tuannu, sa’la’ dasere
dalle’nu ;
kuminasaijakonjo sunggu,
kutinjakiko mate’ne.
Nusunggu tojeng, numate’ne
tojeng todong ;
La’bu bannang ri jawa, mala’buang
umurunu ;
Luara’ tamparang, luarangang
nawa-nawannu ;
tinggi Bawakaraeng,
matinggiampa tuannu ;
le’ba’ gentung tinbaonu, le’ba’
tantang pakkallikku.
Timbao nikida-kida pakalli’
niura’ tallu ;
Le’ba’ basami ba’ra’nu, le’ba’
gusu’ langiri’nu ;
tattanngi pole, capparipa’minyakannu
;
nutulimo ‘antama ri bili’ kamua
liku, kamua kalangang rapa’ ;
mannoso’ badang, mannimba’
bangkeng paciko.
Nukana-kanami sallang saraka ri
pamminangang ;
Tappau’-pau’mi pole bunga-bunga
ri katingroannu ;
nusipoke-poke genre, nusita’ba’
rappo toa ;
nusipattoa-toai , nusipa’loa-loai,
nusipacammo-cammoi
sitanro takkang, sibuccu’ pa’dengka-dengka.
Lino-linopi anging, pakkeke
mappasisa’la’ ;
Numammana’-mana’ sarre, numa’borong
unti jawa
pinruang tuju, pintallung
tassalapangngi ;
manai’ngasemmi mae angrong guru
ningainu, gallarang nipangngalikinnu,
kapala nipaemponu.
Battungasemmi pole, bija
pammanakannu, bella - bella ‘mbani-bani,
Ca’di-ca’di, lompo-lompo,
anak-anak tau -toa ;
Nipanai’mako ri pangka-pangka
bulaeng ;
nipaempomako ri tappere’
paramadani ;
baji’ nangai Nabbi, napujia
Allah Ta’ala.
Sipoko’ bukne tantanna je’ne’
matannu ;
Sipoko’ camba pammatti’na iloro’nu ;
kupatannangangmakonne, anggorok
ri gantironu ;
kupa’lamungangko pole, lemo
tanning ri dolangang ;
nakacinnai somba,
napammattikang irolo’ bate salapang.
Bunting nilekkako paleng
tunipalele bellokang ;
Nierang ri bori maraeng, pa’rasangang
nampa nuonjo’, bori nampa nula’baki ;
nukamma todong jonga, mattoa ri
sampa’ manngayangang tunimalo.
- Nakana kelonna Daeng bunting
Bura’nea :
nampa a’lampa ri balla’ku, naku
joli pakkebukku, naku gulung tapperekku
naku a’nia ri lalang pa’mai,
barang nasarea sikalabine, dalle Karaeng Allah Ta’ala
ku lingka lammatang puli, ri
borong-borong pa’daserang, dalle nipajului battu ri Allah Ta’ala.
- Nakana kelonna Daeng Bunting
Bainea :
Takunjunga’ sallo lolo,
karunrung balu baine, tamammonea’ tope
taero’na tau toaku.
- Nakana pole kelonna Daeng Bunting
Bura’nea :
Kadde’ kucinik Batara, kudupai
allo-allo najo’jokangku lebanga ri pa’maikku.
- Nakana kelonna Daeng Bunting
Bainea :
Kadde’ nania’ erokku, tea’
saju’ ri sa’bea, tea’ salasa ri baju moncong buloa.
- Nakana pole Daeng Bunting
Bura’nea :
Nampako maccu’la lebong, nakurompong-rompong
memang, lompoko naik, kutambai pa’rompongku.
- Nakana kelonna Daeng bunting
bainea :
Apa kicini’ ri nakke, nakke leleng
nake kodi, nakke karo’ba’, nakke caddi simbolengku
- Nakana pole Daeng bunting
bura’nea :
mannu le’leng mannu kodi, mannu
caddi simbolennu, ikauji titti’ matangku, kala’busang pangngaingku.
- Nakana toseng kelonna Daeng
bunting bainea :
Sikatutuiki’ tope, manna ni
sassa ma’mole-mole, tenamontu parekanna maloloa
manna nupake pangngasengang
“lolo pulanaya”.
+ Naik ngaseng maki mae.
